ஸ்ரீவில்லிபுத்தூர் ஆண்டாள் கோயிலில் பெரியாழ்வார் அவதார திருநாளான ஆனி சுவாதி உற்சவத்தின் ஒரு பகுதியாக, வெள்ளிக்கிழமை காலை செப்புத் தேரிழுத்து நிகழ்ச்சி நடைபெற்றது.
108 திவ்ய தேசங்களில் பெயர் பெற்ற இந்த ஆண்டாள் திருக்கோயிலில், மூலவர் வடபத்ரசயன பெருமாள் (பெரிய பெருமாள்) அவதரித்த புரட்டாசி மாத திருவோணம், பெரியாழ்வார் பிறந்த ஆனி சுவாதி, ஆண்டாள் அவதரித்த ஆடிப் பூரம் போன்ற விழாக்கள் சிறப்பாக கொண்டாடப்படுவது வழக்கமாகும்.
பெரியாழ்வார் பிறந்த நாளாகிய ஆனி சுவாதி திருவிழா, ஜூன் 26-ம் தேதி கொடியேற்றத்துடன் தொடங்கியது. 11 நாட்கள் நீளும் திருவிழாவில், பெரியாழ்வார், ஆண்டாள், வெண்ணெய் தாழியுடன் கிருஷ்ணர் போன்ற தோற்றங்களில் எழுந்தருளி, வீதியுலா வந்து பக்தர்களுக்கு அருள்பாலித்தனர்.
விழாவின் முக்கிய நிகழ்வான செப்புத் தேரிழுப்பு வெள்ளிக்கிழமை காலை நடைபெற்றது. பெருமாளும் பெரியாழ்வாரும் சிறப்பு அலங்காரத்தில் செப்புத் தேரில் எழுந்தருள, திரளான பக்தர்கள் தேர் வடங்களை பிடித்து ரத வீதிகளில் ஊர்வலமாக இழுத்தனர். விழா ஏற்பாடுகளை அறங்காவலர் குழுத் தலைவர் பி.ஆர். வெங்கட்ராமராஜா, உறுப்பினர்கள் மற்றும் செயல் அலுவலர் சர்க்கரையம்மாள் இணைந்து சிறப்பாக செய்திருந்தனர்.
