ஸ்ராவண மாதத்தையொட்டி உத்தர பிரதேசத்தில் காவடி யாத்திரை தொடக்கம்; உணவக உரிமையாளரின் விவரங்கள் குறித்து சர்ச்சை
உத்தர பிரதேசத்தில் ஸ்ராவண மாதத்தை முன்னிட்டு காவடி யாத்திரை தொடங்க உள்ளது. இந்த யாத்திரையை முன்னிட்டு, யாத்திரை பாதைகளில் செயல்படும் உணவகங்களில் உரிமையாளரின் பெயர் உள்ளிட்ட விவரங்களை பலகைகளில் குறிப்பிட உத்தர பிரதேச அரசு உத்தரவு பிறப்பித்துள்ளது.
இந்த அரசாணை நடைமுறைப்படுத்தப்பட்டுள்ளதா என்பதை அறிய, பிரபல யோகாசாரரும் துறவியுமான யஷ்வீர் மஹராஜ் தனது 5,000 சீடர்களுடன் சோதனையில் ஈடுபட்டு வருகிறார். இதற்கிடையில், சில உணவக பணியாளர்களின் ஆடைகளை அகற்றிச் சோதனை செய்த சம்பவம் விமர்சனங்களை ஏற்படுத்தியுள்ளது. அதேவேளை, தஜும்முல் என்ற பணியாளர், உணவக உரிமையாளரின் ஆலோசனைப்படி “கோபால்” என்ற பெயரால் வேலை செய்து வருவதாக ஒப்புக்கொண்டார்.
இதனையடுத்து, மேலும் 30 இந்துத்துவா ஆதரவாளர்கள் உணவக உரிமையாளர்களின் அடையாளங்களை கண்டறியத் தங்களை அர்ப்பணித்துள்ளனர். அவர்கள் ராமர், ஹனுமான் மற்றும் சிவன் படங்களைத் தூக்கி, குழுவாக கடைகளுக்குச் சென்று, அங்கு உள்ள பேடிஎம் க்யூஆர் கோடுகளை ஸ்கேன் செய்து உண்மையான பெயர்களை உறுதி செய்கிறார்கள்.
இந்த சம்பவங்களைப் பற்றிப் பேசும் இந்து சங்கர்ஷ் சமிதி உறுப்பினர் நரேந்தர் சிங் தோமர், “உணவுகளுக்கு எச்சில் போன்ற அசுத்தமான பொருட்களை கலந்து, சிலர் எங்கள் மதத்தை அவமதிக்கிறார்கள். உண்மை பெயர்களை கேட்பதில் தவறில்லை, சனாதன தர்மத்தை பாதுகாப்பதே எங்கள் நோக்கம்” என்று தெரிவித்தார்.
உத்தர பிரதேச துணை முதல்வர் பிரஜேஷ் பாதக், “சிலர் காவடி யாத்திரையின் புனிதத்தைக் களங்கப்படுத்த முயல்கிறார்கள். இந்த விவாதத்திற்கு அரசே காரணம் என்று கூறுவது தவறு” என தெரிவித்தார்.
இதைச் சுற்றி, உ.பி.யின் முக்கிய முஸ்லிம் மதவாதியுமான மவுலானா ஷகாபுதீன் ராஜ்வீ பரேல்வி கூறுகையில், “ஒரு உண்மையான முஸ்லிம் தனது பெயரை மறைத்து மத அடையாளத்தை பதைக்கும் போது அது தவறு. இந்நிலையில், அவர்கள் தங்கள் மத அடையாளத்தை வெளிப்படையாக கூற வேண்டும்” என ஆலோசனை தெரிவித்தார்.
