“ஏஜேஎல் நிறுவனத்தின் சொத்துகளை விற்க காங்கிரஸ் கட்சி எண்ணவில்லை; அந்த நிறுவனத்தை காப்பாற்றவே முயற்சி மேற்கொண்டது” என்று காங்கிரஸ் மூத்த தலைவர் ராகுல் காந்தியின் சட்டத்தரணி நீதிமன்றத்தில் வாதமிட்டார்.
சுதந்திரப் போராட்ட காலத்திலேயே ஜவஹர்லால் நேரு தொடங்கிய அசோசியேட்டட் ஜர்னல்ஸ் லிமிட்டெட் (ஏஜேஎல்) நிறுவனத்தில், 5,000-க்கும் மேற்பட்ட சுதந்திரப் போராளிகள் பங்குதாரர்களாக இருந்தனர். இந்த நிறுவனத்தின் மூலம் நேஷனல் ஹெரால்டு உள்ளிட்ட பத்திரிகைகள் வெளியிடப்பட்டன. ஆனால், காலப்போக்கில் நிதி பற்றாக்குறை ஏற்பட்டதால், காங்கிரஸ் கட்சி ரூ.90 கோடி கடனாக வழங்கியது.
இந்த கடன் திரும்ப செலுத்தப்படாத காரணத்தால், ஏஜேஎல் நிறுவனத்தின் பங்குகள் ரூ.50 லட்சம் மதிப்புக்கு ‘யங் இந்தியா’ என்ற நிறுவனத்திற்கு மாற்றப்பட்டன. இதில் 76 சதவீத பங்குகள் காங்கிரஸ் தலைவர்கள் சோனியா காந்தி மற்றும் ராகுல் காந்திக்கு மாற்றப்பட்டுள்ளன. இந்த பரிவர்த்தனை முறைகேடாகக் கருதப்பட்டு, சோனியா மற்றும் ராகுல் காந்தி மீது குற்றச்சாட்டுகள் எழுப்பப்பட்டுள்ளன. ஏஜேஎல் நிறுவனத்தின் மதிப்பு சுமார் ரூ.2,000 கோடியாகும்.
இந்த வழக்கு டெல்லி சிறப்பு நீதிமன்ற நீதிபதி விஷால் காக்னி முன்னிலையில் நேற்று விசாரணைக்கு வந்தது. அப்போது ராகுல் காந்தியின் வழக்கறிஞர் ஆர்.எஸ். சீமா வாதிடும்போது கூறியதாவது:
“ஏஜேஎல் நிறுவனத்தை நஷ்டத்திலிருந்து காப்பாற்றும் நோக்கத்துடன் காங்கிரஸ் கட்சி நடவடிக்கை எடுத்தது. அதன் சொத்துகளை விற்கவேண்டும் என்ற நோக்கம் இல்லை. ஏஜேஎல் என்பது சுதந்திரப் போராட்ட வீரர்கள் உருவாக்கிய நிறுவனம் என்பதற்கேற்ப, அதன் கொள்கை காங்கிரசின் கொள்கையுடன் இணைந்ததாக அதன் ‘மெமரண்டம் ஆப் அசோசியேஷன்’ ஆவணத்தில் குறிப்பிடப்பட்டுள்ளது.”
அதேபோல், ஏஜேஎல் நிறுவனம் வருவாய் ஈட்டும் நிறுவனமாக இயங்கவில்லை என்றும், வர்த்தக நோக்கமற்ற அமைப்பாகவே இருந்ததையும் வழக்கறிஞர் சுட்டிக்காட்டினார்.
கடைசியாக, “கடனாக வழங்கப்பட்ட தொகையை மீட்டெடுத்தல் முக்கியமல்ல; ஆனால், அந்த நிறுவனத்தை பாதுகாப்பதே காங்கிரசின் நோக்கமாகும். அதன் சொத்துகளின் மூலம் லாபம் காணவேண்டும் என்பதே எங்களுடைய நோக்கமல்ல” என வழக்கறிஞர் சீமா வலியுறுத்தினார்.
