“பட்டாசு ஆலை விபத்துகள் தொடராமல் இருக்க, பாதுகாப்பு விதிகளை மீறும் அதிகாரிகளை கைது செய்வதே ஒரே வழி” – புதிய தமிழகம் கட்சி தலைவர் கிருஷ்ணசாமி வலியுறுத்தல்
விருதுநகர் மாவட்டம் மற்றும் அதன் சுற்றுவட்டார பகுதிகளில் உள்ள பட்டாசு மற்றும் தீப்பெட்டி தொழில்களில் பாதுகாப்பு விதிமுறைகள் முறையாக கடைபிடிக்கப்படாததால், மீண்டும் மீண்டும் விபத்துகள் நிகழ்ந்து வருகின்றன. இந்த சூழ்நிலையில், புதிய தமிழகம் கட்சியின் தலைவர் டாக்டர் கிருஷ்ணசாமி இன்று வெளியிட்டுள்ள செய்திக் குறிப்பு மிகுந்த கவலையையும் கடுமையான கண்டனத்தையும் வெளிப்படுத்துகிறது.
அவர் கூறியதாவது:
“சிவகாசி, வெம்பக்கோட்டை, சாத்தூர், ஸ்ரீவில்லிபுத்தூர், கோவில்பட்டி மற்றும் சங்கரன்கோவில் உள்ளிட்ட பகுதிகளில் ஆயிரக்கணக்கான சிறிய, பெரிய பட்டாசு மற்றும் தீப்பெட்டி உற்பத்தி நிறுவனங்கள் இயங்கி வருகின்றன. இதில் லட்சக்கணக்கான ஏழை மற்றும் நடுத்தர வர்க்கத்தைச் சேர்ந்த மக்கள் வேலை செய்து வருகிறார்கள். இந்த தொழில்களில் வெடி மருந்துகள் பயன்படுத்தப்படுவதால் பல்வேறு கட்டுப்பாடுகள் மற்றும் பாதுகாப்பு விதிகள் உள்ளன.
ஒரு பத்துக்கு பத்து அளவுள்ள அறையில் நான்கு வாசல்கள் அமைக்கப்பட்டு, அதில் நான்கு பேர் மட்டுமே வேலை செய்ய வேண்டும் என்பது விதியாக இருக்கின்றது. ஆனால், இந்த சிறிய தொழில் முனைவோர், ஒரு அறைக்கு 10 லட்சம் வரை குத்தகை கொடுத்து தொழிலை நடத்தும் சூழ்நிலையில், அந்த செலவுகளை ஈடுசெய்யும் நோக்கில் விதிமுறைகளை புறக்கணித்து, பயிற்சி அற்றவர்களை கூட வேலைக்குக் கொண்டு வருகிறார்கள். ஒரே அறையில் 15 முதல் 20 பேர் வரை வேலை செய்யும் நிலை உருவாகிறது. இதுவே விபத்துகளுக்கு நேரடியான காரணமாகும்.
கடந்த வாரம் சின்னக்காமன்பட்டியில் ஏற்பட்ட வெடி விபத்தில் 10 பேர் உயிரிழந்தனர். இன்று நடந்த மற்றொரு விபத்தில் 32 அறைகள் முற்றிலும் அழிந்துவிட்டன. இதில் ஒருவர் உயிரிழந்துள்ளார். இது போன்ற சம்பவங்கள் தொடர்ந்து நடைபெறும் நிலையில், ‘சிவகாசி நவீன கொலைக்களமா?’ என்ற கேள்வி உரியதாகவே தோன்றுகிறது.
உயிரிழந்த தொழிலாளர்களின் குடும்பங்களுக்கு உரிய இழப்பீடுகள் வழங்கப்படுவதில் அரசு பல்வேறு சிரமங்களையும் தாமதங்களையும் ஏற்படுத்தி வருகிறது. எதையாவது செய்துவிட்டு சில லட்சங்களை வழங்குவதற்கும் போராட வேண்டிய நிலை உள்ளது.
உலக நாடுகளில் பட்டாசு தொழில்கள் இயங்கினாலும், அங்குள்ள பாதுகாப்பு விதிகள் மிகவும் கடுமையாகவும், துல்லியமாகவும் அமல்படுத்தப்படுவதால் விபத்துகள் குறைவாகவே நடைபெறுகின்றன. ஆனால், நம்மிடம் மத்திய, மாநில அரசுத் துறைகள் மற்றும் அதிகாரிகள் ஊழலில் மூழ்கியிருக்கின்றனர். அவர்களது அலட்சியமே இந்த பாதுகாப்பு தவறுகளுக்கு காரணமாகிறது.
எனவே இனிமேல் இத்தகைய விபத்துகளைத் தடுக்கும் ஒரே வழி – பாதுகாப்பு விதிகளை கைகூடாக கடைப்பிடிக்க வைக்க வேண்டும். அவை அமலாக்கப்படாமல் இருந்தால், பொறுப்பாளிகளான அதிகாரிகளை கைது செய்து சட்ட நடவடிக்கைகள் எடுக்க வேண்டும். அப்போதுதான் தொழிலாளர்களின் உயிர் பாதுகாப்பு உறுதி செய்யப்படும். பட்டாசு தொழில்கள் தொடர்ந்து இயங்கவும் முடியும்.”
இத்துடன், இன்று பட்டாசு விபத்தில் உயிரிழந்த பால குரு சாமி என்பவரின் குடும்பத்திற்கு குறைந்தபட்சமாக ரூ.25 லட்சம் இழப்பீடு வழங்கப்பட வேண்டும் என்றும் டாக்டர் கிருஷ்ணசாமி வலியுறுத்தியுள்ளார்.
