புதுச்சேரியில் விவசாயிகள் பம்ப் செட்டுகளில் இலவச சோலார் பேனல்: முதல்வர் அறிவிப்பு

புதுச்சேரி முதல்வர் ரங்கசாமி, விரைவில் 6,000 விவசாயிகளின் பம்ப் செட்டுகளில் இலவச சோலார் பேனல் நிறுவ திட்டமிட்டிருப்பதாகத் தெரிவித்தார்.

‘என் வீடு என் நலம்’ எனும் வேளாண் துறை திட்டத்தை, புதுச்சேரி தாவரவியல் பூங்காவில் தொடங்கி வைத்த முதலவர், மாடித் தோட்டம் அமைப்பதற்கான ரூ.5,000 மதிப்புள்ள 21 வகை பொருட்களை 3,000 குடும்பங்களுக்கு வழங்கப்படுவதாக கூறினார்.

முதல்வரின் உரை:

“நகரமயமாக்கலால் மரங்கள் குறைந்துள்ளன. வீட்டுப் பகுதிகளில் தோட்டம் அமைக்க இத்திட்டம் உதவும். மாடித் தோட்டம் அமைப்பது ஒரு கலை. இதற்காக ரூ.3 கோடி ஒதுக்கீடு செய்யப்பட்டுள்ளது.

மேலும், விவசாயிகள் பயன்பாட்டிற்காக பம்ப் செட்டுகளில் சோலார் பேனல்கள் இலவசமாக பொருத்தப்படும். இதன் மூலம் மின்விலையைச் செலுத்த வேண்டியதில்லை. ஆரம்ப கட்டமாக 6,000 விவசாயிகள் பயனடைவார்கள்.

பாலின் உற்பத்தி தேவை நாள் ஒன்றுக்கு ஒரு லட்சம் லிட்டர் என்றாலும், தற்போதைய உற்பத்தி 45,000 லிட்டரே. எனவே இளைஞர்கள் கறவை மாடுகள் வளர்ப்பை தேர்வு செய்து, வருமானத்தை அதிகரிக்கலாம். மானியம் வழியாக மாடுகள் வழங்க முடியும்.

சுய உதவிக் குழுக்களுக்கு தின்பண்ட தயாரிப்பு மற்றும் விற்பனைக்காக கடனுதவி வழங்கப்படுகிறது. இதனால் மாநிலத்தில் பணப்புழக்கம் ஏற்படும்.

உள்கட்டமைப்பை மேம்படுத்த ரூ.200 கோடி செலவில் பணிகள் தொடங்கப்படுகின்றன. வீடு இல்லாதவர்களுக்காக நகரப்பகுதியில் 484 குடியிருப்பு வீடுகள், குமரகுரு பள்ளத்திலும் லாம்பர்ட் சரவணன் நகரிலும் கட்டப்பட்டுள்ளது.

சிவப்பு ரேஷன் அட்டையுள்ள மகளிருக்கு ரூ.1,000 வழங்கும் திட்டம் மஞ்சள் அட்டைதாரர்களுக்கும் விரிவாக்கப்பட்டுள்ளது. மேலும், இலவச அரிசி வழங்கப்படும்; விரைவில் 2 கிலோ கோதுமையும் தரப்படும்.

மத்திய அரசின் நிதி உதவியே பல திட்டங்களின் செயல்பாட்டுக்கு முதன்மை ஆதாரம். இது இல்லையெனில் மாநில வரிகளை அதிகரிக்க வேண்டிய சூழல் உருவாகும்.

அரசு பணிகளில் இதுவரை 5,000 பேருக்கு வேலை வழங்கப்பட்டுள்ளது. அனைத்து துறைகளிலும் பணியிடங்கள் நிரப்பப்பட்டு வருகின்றன. அரசு மருத்துவமனைகளில் தேவையான மருந்துகள் அனைத்தும் உள்ளது; வெளியே செல்லத் தேவையில்லை.

சென்னைக்கு செல்லாமல் மருத்துவம் பெறும் வசதியை உருவாக்கியுள்ளோம். அரசு பள்ளி மாணவர்களுக்கு மருத்துவக் கல்வியில் 10% ஒதுக்கீடு வழங்கப்படுவதுபோல், அனைத்து கல்வி துறைகளிலும் இது அமல்படுத்தப்படும்.

புதுச்சேரியின் வளர்ச்சிக்காக மத்திய அரசின் நிதி உதவிக்கு நன்றி,” என முதல்வர் தெரிவித்தார்.

பேரவைத் தலைவர் செல்வம் கூறியதாவது:

“இந்த ஆண்டுக்கான பட்ஜெட்டில் அறிவிக்கப்பட்ட அனைத்து திட்டங்களும் நிறைவேற்றப்பட்டுள்ளன. இளைஞர்களுக்கு வேலைவாய்ப்புகள் தொடர்ந்து வழங்கப்படுகின்றன. 486 காலிப்பணியிடங்களை விரைவில் நிரப்ப நடவடிக்கை எடுக்கப்பட்டுள்ளது. எல்டிசி, யூடிசி பணிகளுக்கான தேர்வுகள் டிசம்பர் மாதத்திற்குள் முடிக்கப்படும்” என்று கூறினார்.

பங்கேற்பாளர் விவரம்:

இந்த நிகழ்வில் அமைச்சர் தேனீ ஜெயக்குமார், எம்எல்ஏ அனிபால் கென்னடி உள்ளிட்டோர் பங்கேற்றனர்.