அஜித்குமார் கொலை வழக்கில் நீதிபதி விசாரணை: அரசு சார்பில் நிவாரண உதவிகள் வழங்கல்
திருப்புவனத்தில், போலீசாரால் கொல்லப்பட்ட காவலாளி அஜித்குமாரின் மரணம் தொடர்பான வழக்கில், உயர் நீதிமன்றத்தின் உத்தரவின்படி மாவட்ட நீதிபதி விசாரணை நடத்தினார்.
சிவகங்கை மாவட்டம் திருப்புவனம் அருகே உள்ள மடப்புரம் கோயிலில் காவலாளியாக பணியாற்றிய அஜித்குமார், தனிப்படை போலீசார் கடுமையாக தாக்கியதினால் உயிரிழந்ததாக கூறப்படுகிறது. இந்த வழக்கு, நேற்று மதுரை கிளை உயர்நீதிமன்றத்தில் விசாரணைக்கு வந்தது. அந்த நேரத்தில் நீதிபதிகள், காவல்துறை மற்றும் அரசு தரப்பினரிடம் பல்வேறு கடுமையான கேள்விகளை எழுப்பினர்.
மேலும், இந்த வழக்கை மதுரை மாவட்ட நீதிபதி ஜான்சுந்தர்லால் சுரேஷ் விசாரிக்க உத்தரவிடப்பட்டது. அதன் தொடர்ச்சியாக, இன்று திருப்புவனத்தில் அவர் நேரில் விசாரணை நடத்தினார்.
அரசு வேலை மற்றும் வீட்டு மனை வழங்கல்
இன்று காலை, அஜித்குமாரின் சகோதரர் நவீன்குமாருக்கு அரசு வேலை வழங்கப்பட்டது. மேலும், அவரது குடும்பத்துக்கு இலவச வீட்டு மனை பட்டா அளிக்கப்பட்டது. இந்த நிவாரணங்களை அமைச்சர் கே.ஆர். பெரியகருப்பன் வழங்கினார்.
முன்னதாக, தமிழக முதல்வர் மு.க. ஸ்டாலின், அஜித்குமாரின் தாயார் மற்றும் சகோதரருடன் தொலைபேசி மூலம் பேசி, தன் ஆழ்ந்த இரங்கலையும், வருத்தத்தையும் தெரிவித்தார்.
இன்று, முதல்வரின் உத்தரவின் பேரில் அமைச்சர் பெரியகருப்பன், அஜித்குமாரின் வீட்டிற்கு சென்று அவரது தாயாரை சந்தித்து ஆறுதல் கூறினார். அதன்பின், அவர்களுக்கு 3 சென்ட் வீட்டு மனை பட்டா மற்றும் நவீன்குமாருக்கு ஆவின் நிறுவனத்தில் டெக்னீசியன் வேலைக்கு நியமன ஆணை வழங்கப்பட்டது. இதனுடன், திமுக சார்பில் ரூ.5 லட்சம் நிதியும் வழங்கப்பட்டது.
இந்த நிகழ்வில், மாவட்ட ஆட்சியர் கா. பொற்கொடி, எம்எல்ஏ தமிழரசி, கோட்டாட்சியர் விஜயகுமார், பேரூராட்சித் தலைவர் சேங்கைமாறன், வட்டாட்சியர் விஜயகுமார் உள்ளிட்டோர் பங்கேற்றனர்.
