இந்திய மீனவர்கள் அத்துமீறி நுழைந்தால் நடவடிக்கை தொடரும் என இலங்கை எச்சரிக்கை

இந்திய மீனவர்கள் இலங்கை கடற்பரப்பில் சட்டவிரோதமாக நுழைந்து மீன்பிடிப்பதை தொடர்ந்து, அவர்களை கைது செய்தல் மற்றும் அவர்களது படகுகளை பறிமுதல் செய்வது போன்ற நடவடிக்கைகள் தொடரும் என இலங்கை அரசாங்கம் எச்சரித்துள்ளது.

இலங்கை மீன்வளத் துறை அமைச்சர் ராமலிங்கம் சந்திரசேகர் கொழும்பில் செய்தியாளர்களிடம் கூறியதாவது:

“இந்திய மீனவர்கள் இழுவைப் படகுகளைப் பயன்படுத்தி இலங்கை கடலில் மீன்பிடித்து வருகின்றனர். இது, குறிப்பாக இலங்கையின் வடக்கு பகுதியிலுள்ள மீனவர்களின் வாழ்க்கையை மோசமாக பாதிக்கிறது. இந்த பிரச்சினையை இந்திய அரசு மத்தியில் தொடர்ந்து எடுத்துச்செல்லுகிறோம். கடந்த இரண்டு மாதங்களில் இந்திய மீனவர்களின் ஊடுருவல்கள் குறைந்திருந்தன. ஆனால் இப்போது மீண்டும் அதிகரிக்க தொடங்கியுள்ளன” என்றார்.

தமிழ்நாட்டில் ஆண்டுதோறும் இரு மாதங்களுக்கு மீன்பிடி தடைக் காலம் அமல்படுத்தப்படுகிறது. 2025-ம் ஆண்டு, ஏப்ரல் 15 முதல் ஜூன் 14 வரை இந்த தடைக்காலம் அமலிலிருந்தது. இது, பாக் ஜலசந்தியில் மீன் வளத்தை பாதுகாப்பதற்காகவே மேற்கொள்ளப்பட்டது.

தடைக்காலம் முடிந்த உடனே, தமிழக மீனவர்கள் மீன்பிடிக்க புறப்பட்டனர். இதன் ஒரு பகுதியாக, ஜூன் 30, 2025 அன்று அதிகாலை மன்னாருக்கு வடக்கே 7 மீனவர்கள் கைது செய்யப்பட்டுள்ளனர். மொத்தமாக 19 மீனவர்களை இலங்கை கடற்படை கைதுசெய்துள்ளது.

இந்த சம்பவம் குறித்து அமைச்சர் சந்திரசேகர் கூறியதாவது:

“பறிமுதல் செய்யப்பட்ட படகுகள் யாழ்ப்பாணத்துக்கு அருகிலுள்ள மைலிட்டி துறைமுகத்தில் வைக்கப்பட்டுள்ளன. மீனவர்கள் மற்றும் படகுகள் மீது சட்டப்படி நடவடிக்கை எடுக்கப்படும். இந்த பிரச்சினையை தூதரக மூலமாக இந்திய அரசிடம் எடுத்துச் செல்வதுடன், சட்டவிரோத மீன்பிடியை தடுக்க இலங்கை கடற்படைக்கு கூடுதல் அதிகாரங்களும் வழங்கப்பட்டுள்ளன” என்றார்.

பாக் ஜலசந்தி மீன்பிடி பிரச்சனை பல ஆண்டுகளாக தமிழ்நாட்டின் மற்றும் இலங்கையின் வடக்குப் பகுதிகளில் உள்ள மீனவர்களை பாதித்து வருகிறது. இந்த விவகாரத்தில் தீர்வு காணும் நோக்கில், 2016-ம் ஆண்டு இந்தியா மற்றும் இலங்கை அரசுகள் இணைந்து ஒரு கூட்டுப் பணிக்குழுவை அமைத்தன. இழுவைப் படகுகளின் பயன்பாட்டை தவிர்க்கும் முயற்சியாக இது ஆரம்பிக்கப்பட்டது. ஆனால் இந்த குழுவின் செயல்பாடுகள் குறித்த தெளிவான தகவல்கள் கிடைக்கவில்லை.

இதுகுறித்து ‘தி இந்து’வுக்கு கருத்தளித்த காரைநகரைச் சேர்ந்த மீனவர் சங்கத் தலைவர் கே. ராஜச்சந்திரன் கூறியதாவது:

“தடைக் காலத்தில் எங்கள் வருமானம் மழையும், பலத்த காற்றும் காரணமாகக் குறைந்துவிட்டது. வாழ்க்கைச் செலவுகள் உயர்ந்துள்ள நிலையில், இந்திய இழுவைப் படகுகள் மீண்டும் வருவதே எங்களுக்கு மேலும் கவலையை ஏற்படுத்துகிறது” என்றார்.

இரு நாடுகளின் மீனவர் தலைவர்களுக்கிடையே நேரடி பேச்சுவார்த்தைகளைத் தொடங்க வேண்டிய அவசியத்தை வலியுறுத்தும் ஊர்காவல்துறை மீனவர் கூட்டுறவு சங்கச் செயலாளர் அன்னலிங்கம் அன்னராசா, அரசாங்கம் இந்த முயற்சிக்கு விரைவில் நடவடிக்கை எடுக்க வேண்டும் எனக் கோரிக்கை வைத்துள்ளார்.